शहरी नक्षलवाद: नव्या युगातील सर्वात मोठं आव्हान
नागपूरमध्ये दिवाळीच्या पार्श्वभूमीवर झालेल्या पत्रकार परिषदेत मुख्यमंत्री देवेंद्र फडणवीस यांनी शहरी नक्षलवाद आणि काँग्रेसच्या राजकीय विचारसरणीवर भाष्य केलं. त्यांनी सांगितलं की, महाराष्ट्रात ग्रामीण भागातील नक्षलवाद जवळपास संपुष्टात आला आहे, मात्र आता त्याहून अधिक घातक असा “शहरी नक्षलवाद” समाजात पसरतो आहे.
शहरी नक्षलवाद म्हणजे नेमकं काय?
मुख्यमंत्री फडणवीस म्हणाले की, शहरी नक्षलवाद हा बिनचेहऱ्याचा आणि विचारांच्या माध्यमातून पसरवला जाणारा प्रकार आहे. हे लोक समाजात वेगवेगळ्या रूपात वावरतात आणि तरुण पिढीला संविधानावरचा विश्वास डळमळीत करण्याचा प्रयत्न करतात.
त्यांनी पुढे सांगितले की, “जेन झी अर्थात नव्या पिढीला चुकीच्या मार्गावर नेऊन, शासन आणि संविधानिक संस्थांवर अविश्वास निर्माण केला जातो. हे सरकारसमोरचं सर्वात मोठं आव्हान आहे. पण डॉ. बाबासाहेब आंबेडकर यांच्या संविधानाच्या ताकदीवर आम्ही या अराजकतावाद्यांचा पराभव करू,” असं फडणवीस म्हणाले.
काँग्रेसवर तीव्र टीका – ‘अल्ट्रा लेफ्टिस्ट विचारसरणी’चा आरोप
फडणवीस यांनी यावेळी काँग्रेस पक्षावरही जोरदार टीका केली. त्यांनी म्हटलं की,
“आज काँग्रेस पक्ष अल्ट्रा लेफ्टिस्ट विचारसरणीने ग्रस्त झाला आहे. इंदिरा गांधींच्या काळातही असं घडलं नव्हतं, पण राहुल गांधींच्या नेतृत्वाखाली काँग्रेस आज ‘विध्वंसक’ मुद्दे उचलत आहे. सरकारवर टीका करणे ठीक आहे, पण संविधानिक संस्थांवर हल्ला करणे लोकशाहीसाठी घातक आहे.”
विरोधकांनी पुनर्विचार करण्याची गरज
मुख्यमंत्री म्हणाले की, “आज भारताच्या राजकारणात विरोधकांनी स्वतःचा पुनर्विचार करण्याची वेळ आली आहे. देशाच्या प्रगतीच्या वाटचालीत बांधणीकारक भूमिका घेण्याऐवजी विरोधक फूट पाडण्याचं राजकारण करत आहेत.”
त्यांच्या मते, विरोधकांनी जनतेच्या हितासाठी काम करणं आवश्यक आहे, अन्यथा ते लोकशाहीपासून अधिक दूर जातील.
जातीय राजकारण आणि जनतेचा विश्वास
जातीय राजकारणाबद्दल बोलताना फडणवीस म्हणाले की,
“जात जनतेच्या मनात नसते, ती काही नेत्यांच्या मनात असते. निवडणुका आल्या की काहींची जात बाहेर पडते. पण जनता आता जागृत झाली आहे आणि म्हणूनच ती नेहमी मला पाठिंबा देते.”
त्यांनी सांगितलं की जनतेला विकास आणि स्थैर्य हवं आहे, विभाजन नव्हे.
मतदार याद्यांमधील घोळावरही फडणवीसांनी प्रतिक्रिया दिली. त्यांनी सांगितले की, “मी 2012 पासून या प्रकरणात उच्च न्यायालयात याचिकाकर्ता आहे. हे प्रकरण नवीन नाही. ग्रामीण भागात नव्हे तर शहरी भागातच या त्रुटी जास्त आहेत. विरोधकांनी जर कोणी दोन ठिकाणी मतदान केल्याचे दाखवायचे असेल तर पुरावे द्यावेत. आमच्याकडे मात्र त्यांच्या मतदार याद्यांतील त्रुटींचे पुरावे आहेत.”
मुख्यमंत्री फडणवीस यांनी स्पष्ट केलं की, महाराष्ट्र सरकार संविधानाच्या मूल्यांवर आधारित कार्य करेल आणि समाजात अराजकता पसरवणाऱ्या विचारांविरुद्ध कठोर कारवाई करेल. शहरी नक्षलवाद हे आजच्या युगातील सर्वात मोठं आव्हान आहे, आणि त्याला तोंड देण्यासाठी सरकार सज्ज आहे.