हडपसरमधील धक्कादायक घटना
पुण्यातील हडपसर परिसरात रिअल इस्टेट व्यावसायिक सादिक हुसेन कपूर यांनी आत्महत्या केल्याची घटना समोर आली असून या प्रकरणामुळे एकच खळबळ उडाली आहे. कॅम्प परिसरातील त्यांच्या कार्यालयात त्यांनी गळफास घेतल्याचे पोलिस तपासात निष्पन्न झाले आहे.
30 पानी चिठ्ठी आणि हातावर लिहिलेली नावे
आत्महत्येपूर्वी सादिक कपूर यांनी तब्बल 30 पानी सुसाईड नोट लिहिल्याची माहिती पोलिसांनी दिली आहे. याशिवाय त्यांच्या हातावरही काही व्यक्तींची नावे लिहिलेली आढळून आली आहेत. या चिठ्ठीमध्ये जमीन वाद, आर्थिक मागणी आणि मानसिक त्रासाचा उल्लेख असल्याचे सांगण्यात येत आहे.
काँग्रेस नेत्याला कुरिअरने पत्र
मृत्यूपूर्वी सादिक कपूर यांनी काँग्रेस नेते प्रशांत जगताप यांना कुरिअरद्वारे एक पत्र पाठवल्याचे समोर आले आहे. या पत्रात काही व्यक्तींवर जमीन बळकावण्याचा आरोप करण्यात आला असून राजकीय आणि प्रशासकीय पातळीवरील दबावाचा उल्लेख असल्याचे तपासात पुढे येत आहे.
आत्महत्येस प्रवृत्त केल्याचा गुन्हा दाखल
या प्रकरणी सुरुवातीला आकस्मिक मृत्यूची नोंद करण्यात आली होती. मात्र, मृताच्या मुलाने दिलेल्या तक्रारीनंतर चार जणांसह इतरांविरोधात आत्महत्येस प्रवृत्त केल्याचा गुन्हा दाखल करण्यात आला आहे. सध्या पोलिस या संपूर्ण प्रकरणाचा सखोल तपास करत आहेत.