BMC Election : दुपारी अडीचपर्यंत AB फॉर्म नाही! शिवतीर्थाबाहेर उमेदवाराची वाढलेली धाकधूक!
मुंबई महानगरपालिका निवडणुकांच्या पार्श्वभूमीवर आजचा दिवस अत्यंत महत्त्वाचा ठरला. नामांकन अर्ज दाखल करण्याचा शेवटचा दिवस असल्याने सकाळी 11 ते संध्याकाळी 5 या वेळेत उमेदवारांची मोठी धावपळ पाहायला मिळाली. मात्र एका उमेदवारासाठी हा दिवस केवळ धावपळीचा नव्हे, तर थरारक आणि तणावपूर्ण ठरला.
गेले दोन-तीन दिवस राजकीय पक्षांच्या कार्यालयांमध्ये इच्छुक उमेदवारांची गर्दी होती. हातात AB फॉर्म नसल्याने अनेक उमेदवार अस्वस्थ होते. शेवटच्या क्षणापर्यंत उमेदवारी मिळेल की नाही, याचा अंदाज न आल्याने वातावरणात प्रचंड उत्कंठा निर्माण झाली होती. हीच परिस्थिती शिवतीर्थ आणि मातोश्री परिसरातही पाहायला मिळाली.
युती संदर्भात झालेल्या पत्रकार परिषदेत राज ठाकरे यांनी “आम्ही यादी जाहीर करणार नाही” असे स्पष्ट शब्दांत सांगितले होते. त्यामुळे मनसे आणि शिवसेना (उद्धव बाळासाहेब ठाकरे) युतीतील इच्छुक उमेदवारांमध्ये संभ्रम अधिक वाढला. अनेक नेते फोन करून उमेदवारांना AB फॉर्मसाठी बोलावत होते, मात्र ठोस निर्णय शेवटच्या क्षणापर्यंत लांबत होता.
प्रभाग क्रमांक 128 हा ठाकरे बंधूंच्या युतीत मनसेसाठी राखीव ठेवण्यात आला होता. महिला राखीव प्रभाग असल्याने सई सनील शिर्के या या प्रभागातून इच्छुक उमेदवार होत्या. त्यांनी मनसेकडून अधिकृतपणे दावा केला होता आणि राज ठाकरे यांच्यासमोर मुलाखतही दिली होती. तरीही नामांकन अर्ज दाखल करण्याची वेळ जवळ येऊन सुद्धा त्यांच्या हातात AB फॉर्म नव्हता.
दुपारी 2.30 वाजले तरी AB फॉर्म न मिळाल्याने सई शिर्के यांची धाकधूक वाढत चालली होती. संबंधित नेते “दहा मिनिटांत होईल” असे सांगत वेळ मारून नेत होते, मात्र प्रत्येक मिनिटागणिक तणाव अधिक वाढत होता. शेवटपर्यंत उमेदवारी मिळेल की नाही, याची खात्री कोणालाच नव्हती.
अखेर मनसेच्या वरिष्ठ नेत्यांनी हालचाली वेगात करत शेवटच्या क्षणी सई सनील शिर्के यांना अधिकृत AB फॉर्म देत उमेदवारी जाहीर केली. मात्र तोपर्यंत नामांकन अर्ज दाखल करण्यासाठी वेळ फारच कमी उरला होता. त्यामुळे सुरुवातीला त्यांना लोकल ट्रेनने घाटकोपरला रवाना करण्यात आले.
त्यानंतर दादर स्थानकातून शिवतीर्थ गाठत स्वतः AB फॉर्म हातात घेऊन त्यांनी थेट नामांकन अर्ज भरण्यासाठी धाव घेतली. काही वेळापूर्वी जी धाकधूक होती, ती वेळेत अर्ज दाखल झाल्याने आनंदात परिवर्तित झाली. शेवटच्या क्षणी मिळालेल्या यशामुळे समर्थकांमध्येही उत्साहाचं वातावरण निर्माण झालं.
महानगरपालिका निवडणुकांच्या राजकारणात शेवटच्या क्षणापर्यंत सुरू असलेली ही धावपळ, रणनीती आणि तणाव याचं हे जिवंत उदाहरण ठरलं आहे. AB फॉर्म मिळेपर्यंत उमेदवारांची होणारी मानसिक घालमेल पुन्हा एकदा समोर आली आहे.