मोदींच्या बालेकिल्ल्यात नवा संघटनात्मक प्रयोग! वडोदरा नवनिर्माण संघामुळे भाजपसमोर आव्हान?
गांधीनगर | 8 सप्टेंबर 2025: गेल्या तीन दशकांपासून गुजरातमध्ये एकहाती सत्ता गाजवणाऱ्या भाजपसमोर आता वडोदऱ्यात एक नवं आव्हान उभं ठाकलं आहे. मोदी समर्थक आणि संघ स्वयंसेवकांनी मिळून ‘वडोदरा नवनिर्माण संघ’ (VNS) या संघटनेची स्थापना केली आहे. त्यामुळे भाजपच्या गड मानल्या जाणाऱ्या वडोदऱ्यातील राजकीय समीकरणे बदलण्याची शक्यता व्यक्त केली जात आहे.
मोदींच्या मतविक्रमाची भूमीच आता आव्हानासमोर
२०१४ लोकसभा निवडणुकीत वडोदऱ्यातील मतदारांनी नरेंद्र मोदींना तब्बल ८,४५,४६४ मतं दिली होती. मोदी ५,७०,१२८ मतांनी विजयी झाले होते. हा विक्रम भाजपच्या संघटनात्मक ताकदीचं दर्शन घडवणारा होता. परंतु याच भूमीत आता मोदी प्रेमींनी भाजपविरोधात नवा पर्याय उभा केला आहे.
वडोदरा नवनिर्माण संघ (VNS) – स्थापनेमागचा हेतू
२३ ऑगस्ट २०२५ रोजी VNS ची स्थापना झाली.
- संयोजक: हार्दिक दोशी
- सल्लागार: किर्ती पारेख (७०) आणि भालचंद्र पाठक (८२) – दोघेही जुने संघ स्वयंसेवक
- महत्वाचे सदस्य: हरनी बोट दुर्घटनेतील पीडितांचा खटला लढवणारे वकील हितेश गुप्ता, एमएसयूचे प्राध्यापक सतीश पाठक
आजवर सुमारे ६ हजार प्रभावी व्यक्ती या संघटनेशी जोडल्या गेल्या आहेत.
हार्दिक दोशी यांनी स्पष्ट केले की, “शहराचा विकास व्हावा हा मुख्य हेतू आहे. आम्ही राजकारणासाठी नव्हे, तर चांगले चेहरे शोधण्यासाठी संघटना उभी केली आहे. मात्र, राजकीय पक्षांनी योग्य उमेदवार न दिल्यास आम्ही निवडणुकीत उतरू शकतो.”
भाजपमधील नाराजी आणि VNS चा उदय
- बाहेरचे नेते पुढे: विद्यमान खासदार डॉ. हेमांग जोशी (पोरबंदरचे मूळचे) आणि शहराध्यक्ष डॉ. जयप्रकाश सोनी (पाटणचे रहिवासी). स्थानिक कार्यकर्त्यांना दुय्यम स्थान मिळाल्याने नाराजी.
- स्थानिक समस्या:
- 2024 मध्ये आलेल्या पूरामुळे नागरिकांचं मोठं नुकसान
- हरणी बोट दुर्घटना
- विकासकामांची संथ गती
- गटबाजी: भाजपमध्ये अंतर्गत गटबाजी वाढली असून, वडोदऱ्यातील एकाही आमदाराला मंत्रिमंडळात स्थान नाही.
या पार्श्वभूमीवर VNS उदयास आल्यानं भाजपसाठी ही निश्चितच धोक्याची घंटा मानली जात आहे.
वारसा आणि विकास – VNS ची मते
VNS चे सल्लागार किर्तीभाई पारेख यांनी सांगितले,
“नरेंद्र मोदींनी वारसा आणि ऐतिहासिक दर्जा जपत विकास व्हावा यावर नेहमी भर दिला. पण वडोदऱ्यात याकडे दुर्लक्ष झाले. मांडवी गेट असो वा न्याय मंदिर – वारसा वास्तूंची अवस्था बिकट झाली आहे. उमेदवार दिल्ली किंवा गांधीनगरमधून न ठरवता वडोदऱ्यातून निवड व्हावी, हीच आमची भूमिका आहे.”
भाजपसाठी किती मोठं आव्हान?
गेल्या निवडणुकीत भाजपनं वडोदऱ्यातील १९ व्या प्रभागातील ७६ पैकी ६७ जागा जिंकल्या होत्या. पण गेल्या काही वर्षांत पक्षाने स्वतःच्या नगरसेवकांवर कारवाई केली, स्थानिक पातळीवर असंतोष वाढला आणि बाहेरच्यांना संधी दिल्याने कार्यकर्त्यांमध्ये असमाधान निर्माण झालं.
यामुळे आगामी निवडणुकीत VNS भाजपसाठी मोठं डोकेदुखी ठरू शकतं, असं राजकीय विश्लेषकांचे मत आहे.
वडोदरा नवनिर्माण संघाचा उदय हा केवळ संघटनात्मक प्रयोग नाही, तर भाजपसाठी गंभीर इशारा आहे. मोदींच्या मतविक्रमाची भूमीच जर बंडखोरीकडे झुकली, तर गुजरातच्या आगामी राजकारणावर त्याचे दूरगामी परिणाम होऊ शकतात.
