सोलापूर : सोलापूर शहरात एक धक्कादायक आणि हृदय पिळवटून टाकणारी घटना घडली आहे. फक्त 23 वर्षांचा महाविद्यालयीन विद्यार्थी हर्षवर्धन इंगळे याचा हृदयविकाराच्या तीव्र झटक्याने मृत्यू झाला. या घटनेमुळे संपूर्ण परिसरात शोककळा पसरली आहे आणि युवकांच्या आरोग्याबाबत पुन्हा एकदा चिंतेची चर्चा सुरू झाली आहे.
मिळालेल्या माहितीनुसार, गुरुवारी सकाळी राहत्या घरी असताना हर्षवर्धनला अचानक तीव्र अस्वस्थता जाणवू लागली आणि क्षणातच त्याला हृदयविकाराचा झटका आला. कुटुंबीयांनी तातडीने जवळच्या खासगी रुग्णालयात दाखल केले, मात्र डॉक्टरांनी उपचारापूर्वीच त्याला मृत घोषित केले.
हर्षवर्धन महेश इंगळे (वय 23, रा. राघवेंद्र नगर, मुरारजी पेठ, सोलापूर) असे त्याचे नाव असून तो D-फार्मसीच्या दुसऱ्या वर्षाचा विद्यार्थी होता. मनमिळाऊ स्वभाव आणि नम्र वागणुकीमुळे परिसरात त्याचे मोठे प्रेम होते. अकाली निधनामुळे सर्वत्र शोक व्यक्त केला जात आहे.
त्याच्या पश्चात आई-वडील आणि भाऊ असा परिवार आहे. हर्षवर्धनचे वडील महेश इंगळे हे मोडनिंब (ता. माढा) येथील कर्मवीर भाऊराव पाटील महाविद्यालयात लिपीक म्हणून कार्यरत आहेत. घटना घडली तेव्हा ते ड्युटीवर होते. मुलाला रुग्णालयात दाखल केले आहे हे समजताच ते घरी धावून आले, मात्र तोपर्यंत अवघड सत्य समोर आले होते.त्याच्या जाण्याने इंगळे परिवारावर दुःखाचा डोंगर कोसळला आहे.
हिंजवडी व बावधन परिसरात अपघातात दोन जणांचा मृत्यूदरम्यान, हिंजवडी आणि बावधन परिसरातही अपघातांचे सत्र सुरूच असून दोन वेगवेगळ्या अपघातांत 7 वर्षीय अनुराग चांदमारे आणि 44 वर्षीय वैशाली पाखरे यांचा मृत्यू झाला.
बालेवाडीतील म्हाळुंगे चौकीजवळ अज्ञात टेम्पोने जोरदार धडक दिल्याने छोट्या अनुरागचा जागीच मृत्यू झाला. त्याचे आजोबा बंडू वावळकर व दुसरा नातू अभिनव जखमी झाले असून टेम्पो चालक फरार आहे. पोलिस त्याचा शोध घेत आहेत.
या सर्व दुर्घटनांमुळे महाराष्ट्रात हळहळ व्यक्त केली जात आहे. युवकांच्या आरोग्याविषयी जागरूकतेची गरज आणि रस्ते सुरक्षिततेच्या प्रश्नांवर पुन्हा एकदा आघात झाला आहे.