भारतीय शेअर बाजारात सलग आठ दिवस चाललेली पडझड अखेर थांबली असून, बुधवारी म्हणजेच 1 ऑक्टोबर 2025 रोजी बाजारात जोरदार तेजी पाहायला मिळाली. गुंतवणूकदारांच्या चेहऱ्यावर आनंद परत आला आहे. रिझर्व्ह बँक ऑफ इंडिया (RBI) च्या महत्त्वाच्या निर्णयामुळे बँकिंग आणि वित्तीय शेअर्समध्ये खरेदीचा जोर वाढला आणि बाजाराने चांगली उसळी घेतली.
दिवसाच्या सुरुवातीला बाजारात थोडीशी चढ-उताराची स्थिती होती, पण दुपारी RBI च्या चलनविषयक धोरण समितीच्या (MPC) निर्णयांची घोषणा होताच बाजाराने रंगत घेतली. दुपारी 12:10 वाजता सेन्सेक्स तब्बल 658.10 अंकांनी वाढून 80,925 वर पोहोचला तर निफ्टी 192 अंकांनी उसळत 24,803 वर गेला.
या तेजीचे मुख्य कारण म्हणजे RBI ने Repo Rate सलग दुसऱ्यांदा 5.5 टक्क्यांवर स्थिर ठेवला आणि चलनविषयक धोरणाची भूमिका ‘तटस्थ’ ठेवली. यामुळे बँकिंग शेअर्समध्ये मोठी खरेदी झाली. बँकांना भांडवली बाजाराशी संबंधित कर्जामध्ये लवचिकता देणे, सिक्युरिटीजवरील कर्जावरील मर्यादा कमी करणे आणि गुंतवणूकदारांना अनुकूल पावले उचलल्यामुळे बाजारात विश्वास वाढला.
बाजारातील प्रमुख शेअर्सपैकी श्रीराम फायनान्स, टाटा मोटर्स, ट्रेंट, कोटक महिंद्रा बँक आणि सन फार्मा यांनी 4% पर्यंत उसळी घेतली. त्याचबरोबर बँक निफ्टी आणि वित्तीय सेवा निर्देशांकांमध्ये प्रचंड खरेदी दिसून आली. जागतिक बाजारातून मिळालेला सकारात्मक माहोल आणि मजबूत होत चाललेला रुपया हेदेखील तेजीमागचे महत्त्वाचे कारण ठरले.
गेल्या आठ दिवसांच्या घसरणीनंतर गुंतवणूकदारांमध्ये प्रचंड भीतीचे वातावरण होते. पण RBI च्या निर्णयाने बाजारात नवसंजीवनी आल्याने गुंतवणूकदारांनी धाडसी खरेदी केली आणि वातावरण पूर्णपणे बदलले. यामुळे दीर्घकाळानंतर बाजारात उत्साहाचा माहोल निर्माण झाला आहे.